എന്റെ കാമുകിക്ക് വാലുണ്ടായിരുന്നു
എന്നത് സത്യമാണ്.
ഞാനവളുടെ മുടിപിന്നൂരുമ്പോഴും
ബ്രാഹൂക്കഴിക്കുമ്പോഴും
അവളതു വിദഗ്ധമായുപയോഗിക്കയും ചെയ്യും.
എന്റെ കാമുകിക്ക്
വളരെ നീണ്ടവാലുണ്ടായിരുന്നു
എന്നത് സത്യം തന്നെയാണ്.
അവൾ ചിരിക്കുമ്പോഴും കരയുമ്പോഴും
അതിന്റെ ചുരുളഴിയുകയും
നിവരുകയും ചെയ്യും.
മിക്ക വൈകുന്നേരങ്ങളിലും
ഞങ്ങൾ ആദവും ഹവ്വയുമാകുന്നതും
മറ്റൊന്നുംകൊണ്ടല്ല.
അവളുടെ വാൽ യുഗാന്തരരതിപരിണാമപരീക്ഷണങ്ങളിലേക്കുള്ള
ഞങ്ങളുടെ പാസ്സ്പോർടായിരുന്നു.
അവളുടെ പെണ്ണുടുപ്പുകൾക്ക് അതിനെയൊളിപ്പിക്കാൻ വളരെ പണിപ്പെടേണ്ടിവന്നിട്ടുണ്ട്.
അവളുടെ വാൽ അതിന്റെ വളർച്ചാനിരക്കിൽ
അഭൂതപൂർവമായ പുരോഗതി കാണിക്കുകയും
അവൾക്കതിനെ ചുരുട്ടിവയ്ക്കാനൊരിടം
ഭൂമിയില്ലാതിരിക്കുകയുമായപിന്നെയാണ്
ഞങ്ങളുടെ ഏദൻതോട്ടത്തിൽ
കാലാവസ്ഥ മോശമാകുന്നത്.
അവളെനിക്ക് തൊട്ടതിനും പിടിച്ചതിനും
ബ്രേക്കപ്പ്ഭീഷണികൾ തരാൻ തുടങ്ങിയത്.
അതിനുമേറേ ശേഷമാണ് പള്ള പൊതിയെ ഈച്ചകളുമായി
അവളെ ഞാൻ മരക്കൊമ്പിൽ കണ്ടെത്തുന്നത്.
എന്റെ പെൺകുട്ടി ഒരു വലിയ പെൺപല്ലിയാണെന്ന്
അപ്പോഴേക്കും തെളിയിച്ചിരുന്നു.
മുറിവിൽ നിന്ന് ഒരു ചെറു വാൽകഷ്ണം
മുളച്ചുവരുന്നുണ്ടായിരുന്നു.
ഈച്ചയാട്ടാൻ ഒരു വാൽപോലുമില്ലാത്ത
പെൺജീവികളെ പ്രേമിക്കുന്നവരേ
നിങ്ങളോളം നിസ്സഹായരായി മറ്റാരാണുള്ളത്.
Jan 2018
കാലഘട്ടം മാറി. പല്ലികളെ ആളുകൾ സ്നേഹിച്ചു തുടങ്ങി. ഈച്ചകളുടെ കാര്യമാണ് കഷ്ടം. ഇനി അങ്ങോട്ട് പട്ടിണിയല്ലേ. പാവങ്ങൾ
ReplyDelete