രണ്ടെലികൾ

രണ്ടെലികൾ
ഒന്ന് വെളുപ്പും കറുപ്പും
മറ്റേത് കറുപ്പും വെളുപ്പും

അവർ
പൂച്ചകളുടെ ഒരു ഗുസ്തിമത്സരം
കാണുന്നു.
നാലുവെണ്ണക്കട്ടികൾ
വച്ചൊരു പന്തയംവയ്ക്കുന്നു.
നീലക്കണ്ണുള്ള പൂച്ചയുടെപക്ഷം
ഒന്നാമൻ
നീണ്ടവാലുള്ള പൂച്ചയോടൊപ്പം
രണ്ടാമൻ.

രണ്ടുപേരും
അവരവരുടെ
പൂച്ചകൾക്കായി വാദിക്കുന്നു.
ഉപജാപകർ ഏറ്റുപിടിക്കുന്നു.
വാദം മൂക്കുമ്പോൾ
മത്സരം എലികൾ തമ്മിലാവുന്നു.
പൂച്ചകൾ കാഴ്ചക്കാരാവുന്നു,
കയ്യടിക്കുന്നു,
ഒരേ പായ്ക്കറ്റിലെ
പോപ്കോൺ കഴിക്കുന്നു.

യജമാനൻ എത്തുമ്പോൾ
പൂച്ചകൾ അപ്രത്യക്ഷരാവുന്നു.
ഗോദയ്ക്കുചുറ്റും
അയാൾ
കെണിക്കമ്പി ചുറ്റുന്നു.
ഇപ്പോൾ എലികൾ മാത്രം

കാഴ്ചക്കാർ
ഉറങ്ങികഴിഞ്ഞു
പന്തയപ്പൂച്ചകൾ
വേദിവിട്ടുകഴിഞ്ഞു
ഒരേ എലിപ്പെട്ടിക്കുള്ളിൽ
കിടന്നുകൊണ്ട്
രണ്ടെലികൾ
ഇപ്പോഴും
ഗുസ്തിയിലാണ്